MATU RAM: July 2012

Tuesday 24 July 2012

MATURAM PATHEN THANGTHEENNA LAA BU

Maturam Pathen kohbawkna laa bu tah a dangkah dawngah he byh thai la awm pon.

Maturam he kum santhlang thlaangkah awlka vat on Pathen kohbawkna atycanthen bro nawh la n'haw na u. Tede catah te tiim khui kalawngah Maturam hamla Pathen mah lawngah Pahaam thlil vanhaw na rang on mah awlka on Pathen amah bawk nathai van pon ham la Rev, NgaiTim hawna rang on Matu laa bu tah Pahaam lawngah a van sai cyk la awm.

Caantheen hongna acaan thli kop a awm hin vengah heka lakah ah zahawh ngaaila kop kan khyh u badaitila saw Pathen ypna rang on nangmin boih tengah zaksakna awl atawica tah thuui caihna on thut la awm.

Pumat (Unity)

Pentateuch cabu he thlangkhat kah phawh, thut dilai tawngna kalawng Mosi dykna to asop cala aka thumsak kungla awm. Cabu he tee mailai, tinawh atah cabu tlo angla poktih aka tee thli hamla tah alawng a im aka awm saknawh la vik cong thai. Khatben byh bal eng atah, cabu khat rip lawng amah pokna angla boih Israel cathli Izip ram kalawng vathong u tih Kanaan ram ata thlan to lawngpui aka mawt kungla awm. Genesis alangna tah cathut lawng athlok cala a awmna, acykca kawng on nuham paham san (ty), on akawng alam tyngsak kungla awm, tedawngah (exodus) akapong thlangthli kah akawng alam, taana kawng akatok akakym la awm. Exodus lawng Mosi kah mawtna on ukna, Aana awl on bawk im awlpuila kang atyng sak. Leviticus tah athlok ca ro la khawsoih bibina athut la awm tih, Israel cathli lawng Pathen bawkna alawng a im atuuk akiik nala awm. Number lawng athui kok tah Israel he Bawipa kah ralkap Kanaan ram benla zut zut akathloih te atyng sak. Deuteronomy dawngah tah Mosi lawng awl pathum Moab kawlvan ah athui awl, Aana awl thuicaihna awl, on paipi kop caksakna awl athui. Tetih van angla tekah cabu te khat la ren acuut tih kop kop atyngsak. Exodus he Genesis on tuhkaina athuina tah Israel thlangvaang Izip ramla aka cetthuk te atyng sak (Gen 46:26, 27 Ex 1:1). Mosi Kaanan ramla apong u vengah, Joseph kah awl yn, Israel cathli apong u atah Joseph kah ruh te Izip ram kalawng khyn hamla athuina (Gen 50:25; Ex 13:19) dawngah kop huhla awm. Leviticus 1-9 he tee vengah Exodus 25-40 on dalh avaina u te nghuh. Hukhyng kah ca lawngtah bawk im sakna on bawkna alawng a im kawng athui. Khawsoih bibina Exodus 29 lawng tuktou la athui de acim cala aka tyngsak tah Leviticus 8-9 he ni. Cakzeh awkzeh kawng Leviticus lawng athui he Exodus dawngkah apongcyk u veng kalawng abot to dawngkah awlkathli ni. Number lawng he Exodus on Leviticus dawngkah tuhkaina kawng athui van bal. He cabu pathum lawng aka san kok, aka kau kok la athui tah Sinai tlang on ramhym huhang kah a awmna u kawng athui tih, hehy he boih ah dalh dalh avai na u the tah bawkna alawng a im thuina he ni. Deuteronomy tawngcykna dawngah lumha cykla athui awl, Number dawngah Mosi lawng Israel thlikah Sinai kalawng Moab to arym aram kawng akymna, on ah pabe athui tah (exodus) apongna u kawng kop kop athui tih, Aana awlpeek paha kawng on Israelthli kah thungna (Ex 20, Dt 5) kawng athui.

BAIBAL AWLROKNA (INTRODUCTION)

Pentateuch Awlrokna Bible dawngkah lumhacyk cabu panga (Genesis, Exodus, Leviticus, Numbers, Deuteronomy) hy he “Aana awl” tihnawh atah “Pentateuch” (Greek awlla pentateuchos, cabu bu-nga) tila amingna. Tekah cabu bu-nga he abol arai caheet tih lumha cyk on awlpui kok la Judahthli on Kricathli kah Awlkhyh Rym cabu la awm. Hebrew Bible lawngtah Aana Awl (Law),(Prophets) Tawnghathli on Cathutthli (Writings) tila pathum la apek. He awl he Awlkhyh Thai dawngah kop akawng (Luka 24:44). Tecongah Apocrypha cabu Ecclesiasticus (Sirach c. 130 B.C.) lawng khaw cokrokla anathui van. Tekah thlop thlop bolraina Kricathli kah Awlkhyh Rym he B.C. 130 vengkah Greek Awlkhyh Rym te awlpui la a lawh tih thutla awm.

Cathutkung on Cathutna Khawhin

Pentateuch cabu panga he akathut kung khi la ng’huh tah “Mosi kah cabu” (2Dungtokna 25:4; Nehemiah 13:1), “Mosi kah Aana awl cabu” (Neh. 8:1), “Bawipa kah Aana awl” (1Dung 16:40; Ezr 7:10) on “Pathen kah Aana awl cabu” (Neh. 8:18) tila thut te ng’huh. Awlkhyh Thai (New Testament) dawngah khaw tetih van angla Pentateuch akhi na tekhaw ng’huh van bal (Mat. 12:5; Mk 12:26; Lk 16:16; Jn 7:19; Gal 3:10). Pentateuch he Mosi kah cabu tila cabu aka bolrai kungthli lawng athui. Tebyng myhla Pentateuch he Mosi ni cathut kung tila akatyng sakkung Jesuh amah lawngah “Mosi lawng kaikawng athut” (Jn 5:46) tila athui. Luka lawngah khaw Mosi cathutkung tithaina tah “Mosi lawng atawngtih” tila (Lk 24:27) byh vengah nghuh. Atlo Awlkhyh Thai cathutkungthli lawngkhaw Mosi ni Pentateuch cathutkung tila apai pui u (Mt 8:4; 19:7-8; Mk 1:44; 7:10; 10:3-4; 12:19,26; Lk 16:29,31; 24:44; Jn 1:45; 8:5; Celtuih 15:21; 26:22; 28:23; Rom 10:5, 19; 2Kawr 3:14-15).Pentateuch cabu dawngah khaw Mosi lawng ni athut tila athui. Exodus 24:3-7 byh vengah “Mosi thlangping tiimah cet tih Bawipa awl on cangpuina awl te athui pe, thlangpingthli lawng kawpok thikat la hui u tih awl khat la “Bawipa lawng awl avan thuithli boih te kasai u ai ti u.” Teatah Bawipa lawng athui awlthli boih te Mosi lawng athut. Deuteronomy 31:24-26 dawngah khaw amah kah Aana awl thuina te khaw ana kym bal. Aka boih tangte kum 200 khui ah, awllehkung thlang zahawh lawng cathutkung amah lawng amah kawng nawn abol arai tih cabu la acoongsak tihe pawm u nawh. Tethli kah pawm tah (documentary hypothesis) cabu cabel kawnglam aceek akel la pokna, tinawh atah cabu cabel kelkelh cekna ti he ni. Awlpui la Pathen mingathlok thlok la aka awm thuina mai ah “ Pathen (Khaw) ”[Elohim] on “Bawipa (Sathuii)” [Yahweh], awllung (Huta tamna he Hebrew awlla athlok cala aka awm), cil awl kop kop akathum [Gen 12:10-20; 20:1-19; 26:1-11), Aana awl [ Kaan taak Ex. 12:1-20, 21-23; Deut 16:1-8] on Pathen awlka aka mingthli kah athlok thlok la pokna, tethli lawngtah Pentateuch he awlpui la khat la kang aka thlym, aka bol kung Jahwist phawngkung J. c. 950 B.C. (Jahwist’s narrative), Elohist phawngkung E. c. 850 B.C.; Deuteronomy phawng kungkah cabu cabel D. c. 622 -587 B.C.; on (Priestly document) Khawsoih cabu cabel P. c. 500 ( JEDP) kah kutngaw, thut ni ti u. Hekah kawng he zabi pakul khui ah Bible thlangcuih thlangthomthli lawng kop athaila pan ana tlaih u. Bible Carym dawngkah awlka on thaihu rym akathui akatlapthli kah atak huhna angla (archaeological evidence) Mosi kah kutngaw tila acimphan la ahuh u. Tahe atah J,E,D, P aka pawm thlang khatsut lawng cahawi cakhel tih arop acap la aka bolrai awl JEDP he Pentateuch thutkung tila tangna u tlaih nawh. Pentateuch akathut kung he Mosi ti thaina aka awm tah Mosi tah acykca kalawng amah lawng atawng tih akungmah na tih, Mosi ahing vengkah bibi lawhlawhna awlka boih te tahe to thlang zahawh lawng ana pawm tih awlla a awm dawngah ni. Mami lawng pawmtih tangna hamla tah, zanveng kalawng ana sainook, ana binook awlka on Mosi lawng ana hawna cabu cabel a awm dawngah ni. Tekah awlrym awlram aka awm te aciim phanla mingthai la awm (e.g., Gen.5:1; Num 21:14); aty khawhin thawleng u hang tih awlphawh athlok cala thawlengna ana awm hang (Gen.1:1-2:3 on haih Gen. 2:4-2:25) dawngah nghuh. Ahu la Pathen awlhyp akaza tawngha lawng Mosi Pathen laipai te tlop athaw (Deut 18:15-20) tih ca te awlka angla, cil awl angla tahe to akym akawl congah atawm athaap (Gen. 36:31, Deut 34:1-12). Tetila atawm athaap te NIV lawngtah Mosi kah awl monih ti (Ex 11:3; Num 12:3).

PA THEN AWL KA THLI

Jesu Thangna Rom ram ukkung Caesar Augustus sengpahrang lawng Rom ukna ram khui ah aka awm thlaang boih thlangmi sop hamla awl a peek. He he Syria ramah Quirinius ram uk bawi la a awm vengah thlangmi sopna lamhacyk la awm. Te dawng ah thlaang boih lawng ming caziin peek hamla amah khaw la cet u. Josep khaw David kah rui a rawng la a awm van dawngah, Kalili ram Nazareth khaw kalawngah, Judea ram David khaw Bethlehem la ming caziin peek hamla cet hang van. A zu a kang sut, a bungry tih camo aka awmtawm Meri on ming caziin peek hamla cet hih. Bethlehem khaw a pha hih vengah a pahna hamla im a awm nawh dawngah vaitaw im ah pah hih. Te vengah, camo a thangna Khawhin te a pha tih, a caming tawngpa ca te a cuun.Bawipa vaan Celtuih lawng opsoh la a thui pe pon angla, camoming te Jesu tila a sak hih. Camo helhna a awm nawh dawngah himbai on a zawl tih, vaitaw Akhawng dawngah a helh hih. Te vengah te peng pang khui ah tuu aka doonthli te ramhym ah awm u, khawzin ah tuuthli te tot u. Bawipa kah vaan Celtuih te ahimi tengah a phou petih, Bawipa kah bawilenna lawng ahimi kah ateng vaai te athy pe rawngtheeng. Te dawngah ahimi lawng caalla a rih u. Tede vaan celtuih lawngah ahimi tengah,rih u bol.nangmi tengah thlaang boih hamla ym awm tangkiik awlthang theen te kavan khyn.tihin ah David khaw khuiah Thlawnkung te nangmi hamla vathang pon; ahih tetah Kri Bawipa ni. He he nangmi hamla nokna la awm ai. camohimbaai on azawl u tih akhawng dawngah a helh te na huh u ai,’’ a tina. Kawlkalh ah vaan ben kah thlangpingthli te vaan celhtuih on haih phou u tih,Pathen te a koh u: “Sawsaang kok ah Pathen tah bawilen selang, Diklai dawngah amah kaw aka taawng thlaangthli Saw ah ropna awm hawn seh,” tila laa a sak u. Vaan csltuihthli lawng ahimi te a ceh taak u tih vaan dawng la a lui u congah, tuudoonthli lawng, “Bethlehem la cet u silang Bawipa lawng avan thui te byh u lah sih,” ti u. Te dawngah a lola cet u tih Meri, Joseph on akhawng dawngah helh zawngdiik te a huh u. Camo ca te a huh a vengah, camo ca kawng tethli tengah thui pe la aka awm te thlaangthli tengah a thui pe u. Tuudoonthli kah awl aka za thlaangthli boih a kawpok rai u. Tede mel lawng atah tekah thaihuthli te a kaw hkui ah a kym tih a pok. Ahimi tengah thui pena angla thaihu aka awmthli boih Te tuudoothli lawng a huh u vengah, Pathen ming thangpawm ruila pok mel u. Mr. Editoral & Gabrielar

Matu awlkala, Pathen awlciim, Lungna he thlang hing ko monih. (1Cor 13).

(1)Lungna kawng he. Thlang boihlawng lungna,ropna,he calla n’ngaih.Religion boihlawng khaw a cang pui tah lungna he pon ni.Ram uk kung thli lawng khaw awl puila kam hlah na tah ram khui ah lunngna,ropna sai ham tih ram ronngsak ham la a zawm u la awm tih Dilai ah ropna kasai tah Noble kutdou apek u.Te dawng ah lungna he aphu tlo tangkik tih then thlang lungnahe thlang boih on ram boih lawng khyh thai pai kawi nih raltuk na,tawh sii na; awl pungna he awmnawh sui de.Te dawng ah lungna kawnghe a dang kah ang la ka tyng sak. (1)Thlang hing ben kah n’khyh lungna. He lungna he Bible lawng byng cang pui la awm nawh ,thlanghing pakhat on pakhat lak law ah ka awm lung na ni.Cakaw thli teng ah pa za thli on thlangtlo lungna he ni. Nupa on canua thli laklaw ah ka awm lungna he khaw bro then.Dilai kawlkalh ca hing vengkah hamla then thlang tih mawm thlang.Thlang khasut lawngtah thlangtlo thli on lung u ham la khyh ton kova peseng u the tih lungna ropna asai u.Huuitai khaw bronawh a khyh u tih yp u. Tede a bot to lungna lawng aceh pui kai aw?Aty a can lawng a pha atah tawhsi na on thii u na kop awm.Te lawng thlang bol ah zuva laklaw ah pia teng ah ram on ram pek bouna lacong.He ang lungna thli he tah, taksa lungna mai ni.Tasaksa lungna lawng tah ari amawng a khy ,pekbouna akhyh,mikhai a dan,Laa ka pawh kung lawng a thui tah thlangtlo lungna ham he khaw thaihu then ti kaming ,lungnakhyh hamka kamhlah veng thii na zahawh ti.Tu dawngah ti atah thlang hing lawng lungna n’khyh nawh dawng ah ni. (3)Pathen tengkah lungna. Pathen tah lungna pathen la awm.Te lungna te ka khyh thli lawng tah amah te a khyh van.Jesu lawng cabu thai dawng ah awl pui la acang pui tah lungna he ni.Dilai thlang teng ah lungna he avot dawng ah Pathen a mah kah lungna he thlanghing pum tak dawng ah sopsakham a ngaih dawngah ni.Pathen lawng mami tengah m’peek a cimmuithla rang on mamikah thinkaw lungbui te lungnaonavansym(Rom5:5)Sayapual lawng khaw lungna he awlpuila akhyh bal.Lungna n’ khyh nawh tah poi op ni.Ongna awm sui de uah ai,Ngai yp na khaw bot ai,tede lung na tah awm tongtong ai ,Dilaidawng ah khaw lungna a awm angla van ah khaw awm hyn bal ai,tu ah ti ah tah mami kahPathen tah lungna la awm tih lungna khui ah n’awm u pon ai.Te dawng ah lungna ka tlap thli on sai hamla ka ngaihthli lawng lungna na huu nawh my.Lungna he mah kah nawh dawng ah, khyh ham la n’ ngaih u,lungna awl n’ thui u,rop naawl n’cang pui u de lung na awm nawh thii na vapung tare.Bawipa thum nawh lung na he tu la khaw cawm thawk nawh.Lungna khyh van pon n’ ti de bot ai.Dilai dawngkah kavat lungna lawng ka hingna raina apek popa.Aw Bawipa nang byng lungna lana awm.Lungna on n’ cang pui lah.Te ah tah lungna lawng n’mawt pon ai.Raltuukna,tawhsi na,thii na thli te ouh pon ai.Thlanghing kah lungna bot ve tih Pathen teng kah lungna tah dungzan to cak ai.Lung na he tah pa then ko ni.Lungna lawng tah ngah ngah a yh tih,renna akhyh.Yytna khyh nawh, hool u nawh,Ook u nawh,A thin the nawh,a thinsa pa rap nawh,thai hu the te kymmang khak nawh,Awl tak te a ym.Te lungna te khyh thai na ham Pathen teng thang thui na on bih u sih.

Krismas hin on Tuhkai u tih

Krismas hin on Tuhkai u tih Diklai han ah thlangbol bro nawh la a pung angla pokna khaw bro nawh la zahawh. Kum rook December thla pha veng awmngaih tangkiik on Bawipa Jesu thangna khawhin te ana ym u. Diklai thlawnkung Bawi thangna khawhin te ym hamla awm pai. Tede, khatsut lawng atah Krismas hin he awlpui betla a pok u tih khatsut lawng atah awlpui nawh la a pokna a awm dawngah adang kah angla tyngsak hamla ka ngaih. Krismas Kawnghu a tawi tyngsakna: Nova lawng ca pathum a cuun tih Shem, Ham on Japhet a mingna. Ha lawng Kusa a cuun, Kusa lawng Nimrod a cuun. Tekah Nirod tah diklai han ah thara thlaang, Pathen haai-ah tha ka ra sakaap thlaang la awm (Gen. 10:1-9). Himrod he thara thlaang la a awm dawngah khawpui pareet a uk tih Babel tila miing asak. Babel kalawng Babilon tite va awm. Babel tah prautyk la calna ti ngaihna ni. Te kah Babel khawpui aka synkung kah thangpawmna lungbui te Bawipa lawng a ngaih nawh dawngah Babel imsaang te a phe pe. Te veng kalawng dilai dawngah awlcawm awlcee pekbouna te awm (Gen. 11:1-9). Nimrod te tetih angla tharana on ah a betoot dawngah a ram khui kah thlangping lawngah Pathen angla a bawk u. A patawng hang tih a dyk tawm veng hetihla awl a yyn. Kai ka dyk atah khawmik khui la ka kuun selang khaw ka sa ai, te dawngah khawmik te bawk uh atina. Amah dyk hu atah a pilnamthli boih lawng khawmik te a bawk u. Tih a dyk hu can a div cong atah a zu Samiram te a bung ry. A cuun ham koi ca te huhsit la a awmna nawh hamla titih hetihla khaw a khan. A peeng a raam khui kah bawi maangthli boih a khy tih sengpahrang im haai-ah belphaithli a khyhsak. Te kah belphaithli dawngah sui, tangka on lungvar phu tlouthli a mah pok a awm atah he kah ka cuun ham koi camaw he khawmik kah ca la awm ai tila awl a khyh. Pilnam rangpui lawng khawmik dawngah khaw aka sa Nimrod kah cap ate lamtoom on belphaithli te khaw a zin thlan veng talawng ah boih a tloong u. Nimrod zu Samiram lawng a laipaithli te khawzin ah a hyp la a tuih tih sui, tangka on lungvar phu tlouthli te talawng ah belphai dawng a khyhsak. A vyn myncang khaw a thaih venga atah belphai dawng kah sui, tangka on lungvar phu tlouthli te rangpui lawng a huh u. A kawpok calla a raisak u tih sengpahrang nu kah a ca he khawmik kah a ca ni tila rampum ah a phawngsak. Camaw te December ni 25 hin ah a cuun, tih Tamut tila ming a sak. (Ezek. 8:14). Tamut te a roong hang atah ana pa Nimrod zyng ah Sengpahrang a bi. Tamut a dyk hu atah kum rook December thla ni 25 hin te Tamut kah thang hin ym poi a sai u popa. Te cong Rawm ukna ty (AD 312) a pha veng Rawm ukkung bawi Kunstantin tah raltuk a ceh hinat ah vaan ben ah vailam tung a huh. He raltukna ah ka taa atah Kricathli kah Pathen ka bawk ai tila awl a kam. A awlkam angla raal a taa tih te veng kalawng Tamut sengpahrang kah thang hin ymna poi December ni (25) hint e Bawipa Jesu thangna hin la a thaw pe. Te hin kalawng tihin to Kri thlangbol a kuum ngai lawng December ni 25 hin te Jesu thang hin la po ana hawna u. Adang kah pokna he kop byh lah sih: Bethlehem khaw vaitaw im ah cuun ham ni, thla sop on caming cuun tih, (Luka 2:6) tila Baibul lawng a thui. Meri he thla sop la ca a cuun tite ming u. Dilai dawng thlangcuih mingthangthli kah tel Encyclopedia Britanica Cabu dawng “huta khat lawng ca a cuun veng huta atah hin 266-267 law tih, tawngpa atah hin 270-271 law” tila a thui. Te dawngah cuun hin 270 tihnawh atah 271 hin te a hula kop teekawi pum a kym hin te ming u. Juda Calendar teena ah Bawi Jesu thangna kum tah 3759 lum, roshhashana, Tirhi ni (1) hin la awm. Juda Calendar 3759 lum te ningmi kah Calendar ah 3 BC la awm. Roshhashana tah Rengsara tum poi (Yom Teruah) la awm. Juda Calendar kah Tirhi ni (1) hin te ningmi kah Calendar (Karikorian Calendar) ah September ni (11) la awm. Te dawngah Bawi Jesu thang hin he 3 BC September ni 11 tila Roy A. Rein Hold lawng a thui. Khawhinthli dawngah Pathen Kamthlahna: “Khawhin pakhat lakah pakhat theen bet tila khasut lawngah a pok, thlaang boih a kawngaih angla hawn she. Khawhin aka tot lawng Bawipa hamla a tot tih, aka tot nawh lawng khaw Bawipa hamla tot nawh, (Rawm 14:5-6)” tila Baibul lawng ng’cangpui. Te dawngah khawhin he awlpui la pok nawh tih, khawhin aka syynkung Pathen he awlpui betla ka pok. Pathen lawng a sai thaihu boih he “Amah dawng kalawng Amah hamla a sai (Rawm 11:36). Te dawngah Krismas on tuhkai u tih a khawhin lak ah Jesu Amah he awlpui ngai tih, a khawhin ymna lakah Jesu Amah ym ngai hamla theen. Jesu he vai at byng cuun la a awm monih, Amah aka tangnathli thinkaw khui ah hinrook a thai la cuun popa hamla awm. Krismas tihe tu nym? Krismas tit ah “Pathen kah laksawng” tina ni. “Metihtiah ningmi hamla camaw cuun la awm (Isai. 9:6), ti on “Pathen lawng diklai (thlangthawlh) a lungna tangkiik dawngah Capa khyhdyyn a peek (Johan 3:16)” ti awl he tuhkai u. Pathen kah lungna khui kalawng aka thong laksawng tah Capa Jesu Kri rangon dungzan hingna he ni (Rawm 6:23). Laksawng tihe mah ben kah saina, thahyrna angoo myhla a zo peek te ni. Pathen kah laksawng peek dungzaan hingna dawng thlanghing thahyrna on saina thuum nawh tina ni. Krismas kah kamthlahna: Pathen kah dungzaan kamthlahna tah awlpui pakhat la awm. Dilai thlangthawlhthli thlawnna he Pathen kah kamthlahna a bou kok la awm. Pathen tah Muithla la awm (John 4:24). Thlangthawlhthli tah taksa la a awm dawng muithla kah thaihu te ming u nawh (I Kawrin 2:14). Te dawngah pumas thawlh dawngah aka tliim dingrii thlangthawlh thlawn hamla Pathen te taksa pum la va law (Heb. 10:5, Joh. 1:14). Thlanghing coongna dawng kalawng Pathen kamthlahna a sopna hamla ni. Krismas aka dou khasutthli: Herod: Jesu thang ty ukkung bawi la awm. Jesu kah thangna te thlang ngawnna on a dou. Amah saw-ah ukkung awm a ngaih nawh dawngah thlang a ngawn. Jesu dilai dawngah cuun la a awmna tah dykna khui kalawng hingna peek hamla ni. Te dawngah Krismas ng’douna u lawng muithla be thlangngawnna law awm myhla thlanghing peekna la awm seh. Khawlaw ben kah thlangcuihthli: Saw ben aisi maawtna on Bethlehem vaitaw akhawng dawng kah camaw te a huh u tih a phu aka tlou laksawng on a bawk u. Mami ah a phu aka tlou kok hingna peesengna on Jesu te dou u van sih. Tuudoonthli: Van thlaang kah awlthang a zaak u, a tuuthli a ceh taak u tih camaw te a huh u veng Pathen te kawpok rai tangkiik on a thangtheensak u. Khyhton kova on dilai thaihu boih te cehtaak tih Jesu te dou u silang kawpok rai Pathen hingna on thangtheensak u van sih. Simion: A Ciim Muithla kah maawtna rangon bawkim a pha tih Camaw te a huh. A kut ah a pawm tih Pathen a thangtheen. Dilai Thlawnkung Bawi he ka mik roo on ka huh po dawng ngaimaawng la ka dyk pon ai tila Bawipa a thangtheensak. Jesu Kri he mah thinkaw muithla mik on huh tih mah muithla kut on pawmna a awm nawh atah hingna ah ngaimaawngna tihe awm thai nawh. Te dawngah Krismas on tuhkai u tih pokna a phun phun awm mai cakhaw Bawipa pakhat byng ni. Huhna a phun phun awm mai cakhaw Muithla khat byng ni. Pathen kah dungzaan kamthlahna dawng Kri hing cuuthaih tih thinkaw, lungbui khui ah Kri a thai la cuun popa rui on Pathen kah bawilenna hamla hing u van pon sih tila he catawi on thapeek hamla ka ngaih. “Soprep boih he Amah dawng kalawng Amah rangon Amah hamla hawn seh.” Amen.